යාල ජාතික වනෝද්‍යානය ඇතුළු මෙරට ජාතික වනෝද්‍යාන නැරඹීමට පැමිණෙන විදේශීය සංචාරකයින්ට ඩොලර් මගින් ගෙවීම් කර ප්‍රවේශපත් ලබා ගැනීමේ පහසුකම් මෙම මාසයේ සිට ආරම්භ කිරීමට වනජීවි හා වනසම්පත් සංරක්ෂණ අමාත්‍යාංශය කටයුතු සැලසුම් කර තිබෙනවා.
රටේ ආර්ථිකයට ඩොලර් ඉපයීම අරමුණු කර ගනිමින් මෙම පියවර ගන්නා ලෙසටයි අමාත්‍ය මහින්ද අමරවීර විසින් නිලධාරින්ට උපදෙස් දී ඇත්තේ.
ඒ අනුව මෙම වැඩපිළිවෙළ ජනවාරි මාසය තුළ ආරම්භ කරන අතර, පළමුව යාල ජාතික වනෝද්‍යානයෙන් එම වැඩපිළිවෙළ ක්‍රියාත්මක කිරීමට පියවර ගන්නා බව අමාත්‍යාංශ ලේකම් චන්ද්‍රා හේරත් මහත්මිය දැනුම් දී තිබෙනවා.
මේ අතර දෙස් විදෙස් සංචාරකයින් මේ දිනවල යාල වනෝද්‍යානය නැරඹීමට බහුල වශයෙන් පැමිණෙන බැවින් සංචාරකයින් සඳහා ලබා දෙන පහසුකම් වැඩි කිරීමේ වැඩපිළිවෙළක් වහාම අරඹන ලෙසට අමාත්‍යවරයා නිලධාරින්ට උපදෙස් දෙනු ලැබුවා.
අලුතින් ඉදි කරන ලද සංචාරක බංගලා දෙකක වැඩ කටයුතු මේ වනවිට අවසන්ව ඇති බැවින් ඒවා සංචාරකයින් සඳහා ලබා දීම මෙන්ම මධ්‍යාහ්න 12 සිට පස්වරු 02 දක්වා පැය දෙකක කාලයක් වනාන්තරයේ සංචාරය කිරීම අත්හිටුවන බැවින් එම කාලය තුළ දෙස් විදෙස් සංචාරකයින්ට විවේක ගැනීම සඳහා ඉදි කෙරෙන විවේක ස්ථානයේ ඉදි කිරීම් කටයුතු ද වහා අවසන් කරන ලෙසටයි අමාත්‍යවරයා උපදෙස් දී ඇත්තේ.
