දේශීය ආදායම් දෙපාර්තමේන්තුවේ පරිගණක පද්ධතිය (RAMIS) තාක්ෂණික ගැටළුවකට ඊයේ (30) ඇතිව තිබුණා.
මේ වන විට යථාතත්වයට පත් කරමින් පවතින බව මුදල් රාජ්‍ය අමාත්‍ය ශෙහාන් සේමසිංහ අද (01) පාර්ලිමේන්තුවේදී සඳහන් කළා.
වර්ෂයට අදාළ ආදායම් වාර්තා සෑම වසරකම නොවැම්බර් මස 30 වන දිනට හෝ ඊට පෙර, දේශීය ආදායම් දෙපාර්තමේන්තුව වෙත ඉදිරිපත් කළ යුතු වනවා.
මේ අනුව 2021/2022 වර්ෂය සඳහා ආදායම් වාර්තා ඉදිරිපත් කිරීමට නියමිත දිනය ඊයේ (30) දිනට දී තිබුණා.
මේ හේතුවෙන් ඊයේ දින පද්ධතිය භාවිත කරන්නන් වැඩි ප්‍රමාණයක් එකවර පිවිසීමට උත්සාහ දැරීම නිසා පද්ධතියේ තදබදයක් ඇතිව ති බවයි රාජ්‍ය අමාත්‍යවරයා සඳහන් කළේ.
ඒ අනුව පද්ධතියට පිවිසීමට තිබූ බාධාව මේ වන විට යථා තත්ත්වයට පත් කරමින් පවතින අතර, දින දෙකක් ඇතුළත මෙය සම්පූර්ණයෙන්ම යථාතත්ත්වයට පත් වනු ඇති.
නොවැම්බර් 30 දින වන විට ඉදිරිපත් කිරීමට නියමිතව තිබූ පුද්ගලික ආදායම් බද්ද, සමාගම් බද්ද, හවුල් ව්‍යාපාර බද්ද යනාදී බදු වාර්තා ඊයේ දිනයේදී ඉදිරිපත් කිරීමට නොහැකි වූවන්ට සතියක කාලයක් තුළ එම වාර්තා ඉදිරිපත් කිරීමට අවස්ථාව ලැබෙන බවයි අමාත්‍යවරයා පැවසුවේ.
එකී කාලය තුළ ලබා දෙන වාර්තා නොවැම්බර් 30 දින ලබා දුන්නා සේ සළකා කටයුතු කරන අතර, මෙම කාලයට අදාළ අධිභාර නිදහස් කිරීමට මුදල් අමාත්‍යාංශ ලේකම් විසින් උපදෙස් ලබා දී තිබෙනවා.
