හෙට (23) සිට ජූනි මස 1 වනදා දක්වා අපොස සාමාන්‍ය පෙළ විභාගය පැවැත්වෙන දිනයන් හි විභාග කාලය තුළ දී විදුලි කප්පාදුවක් සිදුනොකරන බව මහජන උපයෝගීතා කොමිසම සඳහන් කරයි.

අද (22) දහවල් පැවති විශේෂ මාධ්‍ය හමුවකට එක්වෙමින් එහි සභාපති ජනක රත්නායක මහතා පවසා සිටියේ, විභාගය පැවැත්වෙන දිනවල සවස 6.30න් පසුව ද විදුලි කප්පාදුවක් සිදුනොකරන බවය.

මේ අතර අද සහ 29 වන ඉරිදා දිනයේ දී ද විදුලි කප්පාදුවක් සිදුනොකරන බව ජනක රත්නායක මහතා කියා සිටියේය.

එම කාලයේ දී අවශ්‍ය විදුලිය උත්පාදනය සඳහා අවශ්‍ය ජලය, ජල කළමනාකරණ ලේකම් කාර්යාලය මඟින් ලබාදී ඇතැයි ද ඒ මහතා පැවසීය.

මේ අතර අද දිනයේ දී නොරොච්චෝලේ විදුලි බලාගාරය ජාතික පද්ධතියට නැවත එක්ව ඇතැයි ද ජනක රත්නායක මහතා මෙහිදී කියා සිටියේය.

ඒ අනුව එම විදුලි බලාගාරයෙන් ලැබෙන මෙගාවොට් 260ක ප්‍රමාණය හෙට රාත්‍රියේ සිට ජාතික පද්ධතියට එක්වනු ඇත.